По повод 85 години од 11 Октомври 1941, Денот на народното востание (8.9.1945) музејот го промовира проектот „Катче на сведоштва“ од Годишната програма во областа на музејската дејност и заштитата на нематеријалното културно наследство.
Со проектот се реализира технолошко осовременување и дополнување на постојаната поставка „Македонија во Втората светска војна“, интегриранo во темата „Лична и семејна историја“, кое на посетителите ќе им овозможи интерактивно, но и лично доживување на историското и културното наследство.
Изработен е краток интерпретативен филм со документарна вредност „Одгласи на една хероина“, посветен на Вера Циривири-Трена (21.05.1921, Прилеп – 15.07.1944, Штип) македонска комунистка и истакната организаторка на антифашистичката и Народноослободителната борба во Македонија за време на Втората светска војна.
Животната приказна на Вера Циривири -Трена оживува преку автентичните сеќавања и сведоштва на нејзините соработници и членови на семејството, како и учесници во антифашистичката и Народноослободителната борба. Нивните гласови го пренесуваат споменот за нејзиниот живот, храброст и посветеност, поврзувајќи ја личната приказна со историското време во кое таа живеела и дејствувала.
Промоцијата на проектот се реализираше во соработка со учениците од втора и трета година од Математичко-информатичката гимназија МИГ од Скопје, кои имаа можност премиерно да ги слушнат директните сведоштва на соборците и членовите на семејството на Вера. Во креативната работилница под водство на авторката Трајкова Крстиќ и професорката Анета Станковиќ-Мирковска, преку непосредно и лично музејско доживување, учениците стекнаа продлабочени знаења и нова перспектива на приказната за македонската хероина чиј животен пат е нераскинливо врзан со борбата за државност и слобода во НОБ.
Автор и раководител на проектот е м-р Данијела Трајкова Крстиќ, виш кустос историчар.
Проектот е поддржан во Годишната програма за национален интерес на Министерството за култура и туризам за 2026 година.
Фотографија и видео: Игор Димовски










