Македонскиот фронт во балканската и во светската историографија е именуван и како: Солунски фронт, Фронт на Ориентот, Балкански, Јужен или Заборавен фронт. Сѐ започналo во октомври 1915 година со концентрација на силите на Антантата во градот Солун, а од декември 1915 година и со воени формации на Централните сили. Главната линија на фронтот се протегала од Охридското Езеро до Орфанскиот Залив на Егејското Море, а помал стратегиски дел ја опфаќал линијата од Охридското Езеро до Валона во Албанија со вкупна должина од 600 км. Денес, на македонска територија, на линијата Дојран - Битола - Охрид, од околу 220 км, сè уште се наоѓаат видливи траги од борбите на фронтот. На него се воделе повеќе сложени воени операции и тешки битки, како оние на Црна Река, Горничево, Кајмакчалан и Добро Поле. Македонскиот фронт бил прв фронт кој сојузниците го пробиле на 15 септември 1918 година во битката кај Добро Поле, со што била навестена капитулацијата на Централните сили.

*Карта – исечок  од  „Новиот атлас на Хармсворт“, Сликовно уредено од „Amalgamated Press“, 1921г. (Подарок од Влатко Милошевски)

* Бугарски војници на пат кон фронтот

*Германски пилоти на Македонскиот фронт

*Српски камп на Македонскиот фронт

*Француска артилерија на Кајмакчалан, 1916 г.

*Сојузниците во село Брод на завојот на Црна Река

*Британски противвоздушен топ, Дојранско Езеро